Jagatguru Nimbarkacharya

Sanatan Dharma ki anadhi parampara mein Jagadguru Shri Nimbarkacharya ka sthan vaisa hi hai, jaisa akash-mandal mein Surya ka - apratim, akhand aur sarvaprakashak. Ve keval ek acharya nahin, apitu Vaishnav bhakti ke us divya srot hain, jinse Nimbark Sampraday ki aviral dhara yugon-yugon se pravahit hoti aa rahi hai.

Prastut granth "Jagadguru Nimbarkacharya - Sanatan ke Surya" ek sudirgha shodh-sadhana ka parinam hai. Ismen Jagadguru ke darshhanik siddhant Dvaitadvaita Vedanta, unki bhakti-paddhati, Bairagi parampara mein unka yogdan aur Sanatan Dharma ki raksha mein unki atulaniya bhumika ko pramanik aitihasik drishti se prastut kiya gaya hai.

Lekhak ne desh-videsh ke tirth-sthalon, prachin granthon aur sant-paramparaon ke gahan adhyayan ke aadhar par yah siddh kiya hai ki Nimbarkacharya na keval Madhyakal ke mahanatam acharyaon mein se ek hain, apitu ve Sanatan Vaishnav Parampara ke aadi-srot hain.

Yah granth un sabhi jigyasuon, bhakton, shodhartiyon aur dharma-premiyon ke liye anivarya pathneey hai, jo Sanatan Dharma ki jadon ko samajhna chahte hain.